0:00
/
1ܘܗَܘܹܐ ܠܵܗ̇: ܟܲܕ ܬܘܼܡܸܡܠܹܗ ܝܼܫܘܿܥ ܠܐܲܢܹܐ ܗܹܡܸܙܡܵܢܹ̈ܐ: ܫܘܼܢܹܐܠܹܗ ܡ̣ܢ ܓܠܝܼܠܵܐ ܘܐَܬܹܐܠܹܗ ܠܬܸܚܘܼܒܹ̈ܐ ܕܝܼܗܘܼܕ ܠܡܲܪܙܵܐ ܐ݇ܚܹܪ݇ܢܵܐ ܕܝܘܿܪܕܢܵܢ. 2ܘܐ݇ܬܹܐܠܗܘܿܢ ܒܵܬَܪܹܗ ܟܸܢܫܹ̈ܐ ܪܵܒܵܐ: ܘܒܘܼܣܡܵܝܠܹܗ ܬܵܡܵܐ. 3ܘܐ݇ܬܹܐܠܗܘܿܢ ܠܟܸܣܠܹܗ ܦܪ̈ܝܼܫܹܐ: ܓ̰ܵܪܘܿܒܹܗ: ܘܒܹܐܡܵܪܵܐ: ܐܸܢ ܒܕܲܣܬܘܼܪ ܝ݇ܠܵܗ̇ ܕܪܲܦܹܐ ܒܲܟ̣ܬܹܗ ܒܟܠ ܗܲܓ̰ܲܬ. 4ܐܝܼܢܵܐ ܗ̇ܘ ܓ̰ܘܼܘܸܒܠܹܗ ܘܐَܡܝܼܪܹܗ: ܠܵܐ ܩܪܹܐܠܵܘܟ̣ܘܿܢ ܕܗ̇ܘ ܕܥܒܸܕܠܹܗ ܡ̣ܢ ܒܪܵܫܝܼܬ: ܐܘܼܪܙܵܐ ܘܢܸܩܒ̣ܵܐ ܥܒ̣ܝܼܕܵܝܠܹܗ. 5ܘܐَܡܝܼܪܹܗ: ܣܵܒܵܒ ܕܐܵܗܵܐ ܒܸܬ ܫܵܒܸܩ ܐ݇ܢܵܫܵܐ ܠܒܵܒܹܗ ܘܠܝܸܡܹܗ: ܘܒܸܬ ܬܲܒܸܥ ܠܒܲܟ̣ܬܹܗ: ܘܒܸܬ ܗܵܘܝܼ ܬܸܪ̈ܘܵܝܗܝ ܚܲܕَ ܒܸܣܪܵܐ. 6ܗܲܕܟ̣ܵܐ ܐ݇ܚܹܪ݇ܢܵܐ ܠܹܐ ܝܢܵܐ ܬܪܹܝ: ܐܸܠܵܐ ܚܲܕَ ܒܸܣܪܵܐ. ܒܲܣ ܡܸܢܕܝܼ ܕܐܲܠܵܗܵܐ ܙܘܼܘܸܓܠܹܗ: ܒܲܪܢܵܫܵܐ ܠܵܐ ܦܵܪܸܫ. 7ܐܵܡܪܝܼ ܐܸܠܹܗ: ܒܲܣ ܩܵܡܘܿܕܝܼ ܡܘܼܫܹܐ ܦܩܸܕܠܹܗ ܠܝܼܵܗَܒ̣ܵܐ ܟܬܵܒ̣ܵܐ ܕܕܘܼܠܵܠܵܐ: ܘܠܪܲܦܘܼܝܘܼܗ̇. 8ܐَܡܝܼܪܹܗ ܐܸܠܵܝܗܝ: ܡܘܼܫܹܐ ܠܕܲܪܩܘܼܒ̣ܠ ܕܩܸܫܝܘܼܬܵܐ ܕܠܸܒܵܘܟ̣ܘܿܢ ܝܘܼܗَܒܼܸܠܹܗ ܕܲܣܬܘܼܪ ܐܸܠܵܘܟ̣ܘܿܢ ܕܪܲܦܝܼܬܘܿܢ ܒܲܟ̣ܬܵܬܵܘ̈ܟ̣ܘܿܢ: 9ܐܝܼܢܵܐ ܡ̣ܢ ܒܪܵܫܝܼܬ ܠܹܐ ܗ݇ܘܵܐ ܗܲܕܟ̣ܵܐ. ܐܝܼܢܵܐ ܐܵܢܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܡ̇ܢ ܕܫܵܒܸܩ ܒܲܟ̣ܬܹܗ ܫܒ̣ܘܿܩ ܡ̣ܢ ܒܗܲܓ̰ܲܬ ܕܙܵܢܝܘܼܬܵܐ: ܘܫܵܩܸܠ ܚܕܵܐ ܐܚܹܪَܬܵܐ: ܒܸܥܒ̣ܵܕܵܐ ܝܠܹܗ ܩܲܗܒܘܼܬܵܐ: ܘܡ̇ܢ ܕܫܵܩܸܠ ܠܫܒ̣ܝܼܩܬܵܐ: ܒܸܥܒ̣ܵܕܵܐ ܝܠܹܗ ܩܲܗܒܘܼܬܵܐ. 10ܐܵܡܪܝܼ ܐܸܠܹܗ ܬܲܠܡܝܼܕܘܼ̈ܗܝ: ܐܸܢ ܗܲܕܟ̣ܵܐ ܫܘܼܠܵܐ ܐܝܼܬ ܒܹܝܠ ܓܲܒ̣ܪܵܐ ܠܒܲܟ̣ܬܵܐ: ܠܹܐ ܝ݇ܠܵܗ̇ ܨܦܵܝܝܼ ܠܸܓܒ̣ܵܪܵܐ. 11ܐܝܼܢܵܐ ܗ̇ܘ ܐَܡܝܼܪܹܗ ܐܸܠܵܝܗܝ: ܟܠ ܐ݇ܢܵܫܵܐ ܠܹܐ ܡܵܨܹܐ ܩܵܒܸ̇ܠ ܠܐܵܗܵܐ ܗܹܡܸܙܡܵܢ: ܐܸܠܵܐ ܡ̇ܢ ܕܝܼܠܹܗ ܝܘܼܗَܒ̣ܵܐ ܐܸܠܹܗ. 12ܣܵܒܵܒ ܕܐܝܼܬ ܡܗܲܝܡܢܹ̈ܐ ܕܡ̣ܢ ܟܹܪَܣܵܐ ܕܝܸܡܵܝܗܝ ܗَܘܹܐܠܗَܘܿܢ ܗܲܕܟ̣ܵܐ: ܘܐܝܼܬ ܡܗܲܝܡܢܹ̈ܐ ܕܡ̣ܢ ܒܢܲܝ̈ܢܵܫܵܐ ܗَܘܹܐܠܗَܘܿܢ ܡܗܲܝܡܢܹ̈ܐ: ܘܐܝܼܬ ܡܗܲܝܡܢܹ̈ܐ ܕܥܒ̣ܝܼܕܵܠܗܘܿܢ ܓܵܢܵܝܗܝ ܡܗܲܝܡܢܹ̈ܐ ܒܚܵܬܸܪ ܕܡܲܠܟܘܼܬܵܐ ܕܫܡܲܝܵܐ. ܡ̇ܢ ܕܡܵܨܹܐ ܩܵܒܸ̇ܠ: ܩܵܒܸ̇ܠ. 13ܗ̇ܝܓܵܗ ܡܘܼܬَܝܹܠܗܘܿܢ ܠܟܸܣܠܹܗ ܝܵܠܹ̈ܕَܐ ܙܥܘܿܪܹ̈ܐ ܕܡܲܬܸܒ̣ ܐܝܼܕܵܬܹ̈ܗ ܥܲܠܵܝܗܝ: ܘܨܵܠܹܐ. ܘܢܓ̰ܘܸܠܗܘܿܢ ܒܝܼܵܝܗܝ ܬܲܠܡܝܼܕܘܼ̈ܗܝ. 14ܐܝܼܢܵܐ ܝܼܫܘܿܥ ܐَܡܝܼܪܹܗ ܐܸܠܵܝܗܝ: ܫܒ̣ܘܿܩܘܿܢ ܠܝܵܠܹܕَܐ ܙܥܘܿܪܹ̈ܐ ܕܐܵܬܝܼ ܠܟܸܣܠܝܼ: ܘܠܵܐ ܡܲܟܠܝܼܬܘܿܢ ܠܗ݇ܘܿܢ: ܣܵܒܵܒ ܕܕܵܐܢܝܼ ܕܐܲܝܟܼ ܕܐܲܢܹܐ ܝ݇ܠܵܗ̇ ܡܲܠܟܘܼܬܵܐ ܕܫܡܲܝܵܐ. 15ܘܡܘܼܬܒ̣ܵܝܠܹܗ ܐܝܼܕܵܬܹ̈ܗ ܥܲܠܵܝܗܝ: ܘܐَܙܸܠܹܗ ܡ̣ܢ ܬܵܡܵܐ. 16ܘܗܵܐ: ܐَܬܹܐܠܹܗ ܚܲܕَ ܘܐَܡܝܼܪܹܗ ܐܸܠܹܗ: ܡܲܠܦܵܢܵܐ ܛܵܒ̣ܵܐ: ܡܘܼܕܝܼ ܡܸܢܕܝܼ ܛܵܒ̣ܵܐ ܥܵܒ̣ܕܸܢ: ܕܗܵܘܝܼ ܠܝܼ ܚܲܝܹ̈ܐ ܕܠܐܵܒܲܕ. 17ܐܝܼܢܵܐ ܗ̇ܘ ܐَܡܝܼܪܹܗ ܐܸܠܹܗ: ܩܵܡܘܿܕܝܼ ܒܸܩܪܵܝܝܼ ܝܘܸܬ ܛܵܒ̣ܵܐ: ܠܲܝܬ ܛܵܒ̣ܵܐ ܫܒ̣ܘܿܩ ܡ̣ܢ ܚܲܕَ: ܐܲܠܵܗܵܐ. ܐܝܼܢܵܐ ܐܸܢ ܒܸܒܥܵܝܵܐ ܝܘܸܬ ܕܥܵܒܼܪܸܬ ܠܚܲܝܹ̈ܐ: ܢܛܘܿܪ ܦܘܼܩܕܵܢܹ̈ܐ. 18ܐܵܡܸܪ ܐܸܠܹܗ: ܐܲܝܢܝܼ: ܝܼܫܘܿܥ ܐَܡܝܼܪܹܗ ܐܸܠܹܗ: ܠܵܐ ܩܵܛܠܸܬ: ܠܵܐ ܥܵܒ̣ܕܸܬ ܩܲܗܒܘܼܬܵܐ: ܠܵܐ ܓܵܢܒܸܬ: ܠܵܐ ܝܵܗَܒܸܬ ܣܵܗܕܘܼܬܵܐ ܕܵܓܵܠܬܵܐ. 19ܘܥܒ̣ܘܿܕ ܐܝܼܩܵܪܵܐ ܠܒܵܒܘܼܟ ܘܠܝܸܡܘܼܟ: ܘܡܲܚܒܸܬ ܠܫܒ̣ܵܒ̣ܘܼܟ ܐܲܝܟܼ ܓܵܢܘܼܟ. 20ܐܵܡܸܪ ܐܸܠܹܗ ܗ̇ܘ ܓ̰ܘܲܢܩܵܐ: ܐܲܢܹܐ ܟܠܵܝܗܝ ܢܛܝܼܪܵܝܗܝ ܝܘܸܢ ܡ̣ܢ ܝܵܠܕَܘܼܬܝܼ. ܡܘܼܕܝܼ ܐ݇ܚܹܪ݇ܢܵܐ ܒܵܨܘܿܪܵܐ ܝܘܸܢ. 21ܐَܡܝܼܪܹܗ ܐܸܠܹܗ ܝܼܫܘܿܥ: ܐܸܢ ܒܵܥܹܝܬ ܗܵܘܸܬ ܟܵܡܝܼܠ: ܙܹܠَܐ ܙܵܒܸ̇ܢ ܡܸܢܕܝܼܘܟ ܘܗܲܒَܠ ܠܡܸܣܟܹܢܹ̈ܐ: ܘܒܸܬ ܗܵܘܝܵܐ ܠܘܼܟܼ ܚܲܙܝܼܢܵܐ ܒܫܡܲܝܵܐ: ܘܬܵܐ ܒܵܬَܪܝܼ. 22ܘܫܡܸܥܠܹܗ ܗ̇ܘ ܓ̰ܘܲܢܩܵܐ ܐܵܗܵܐ ܗܹܡܸܙܡܵܢ: ܘܐَܙܸܠܹܗ ܟܲܕ ܦܫܝܼܡܵܐ: ܣܵܒܵܒ ܕܐܝܼܬ ܗ݇ܘܵܐ ܠܹܗ ܡܵܐܠ ܪܵܒܵܐ. 23ܘܐَܡܝܼܪܹܗ ܝܼܫܘܿܥ ܠܬܲܠܡܝܼܕܘܼ̈ܗܝ: ܬܪܘܿܨܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܥܲܣܩܵܐ ܝ݇ܠܵܗ̇ ܠܕܵܘܠܲܬܡܲܢܕ ܕܥܵܒܼܸܪ ܠܡܲܠܟܘܼܬܵܐ ܕܫܡܲܝܵܐ. 24ܘܡܸܢَܕܪܸܫَ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܒܘܼܫ ܗܵܣܵܢܵܝܝܼ ܝ݇ܠܵܗ̇ ܠܓܘܼܡܠܵܐ ܠܸܥܒܼܵܪܵܐ ܒܢܸܩܒܵܐ ܕܚܡܵܛܵܐ: ܡ̣ܢ ܕܕܵܘܠܲܬܡܲܢܕ ܥܵܒܸܪ ܠܡܲܠܟܘܼܬܹܗ ܕܐܲܠܵܗܵܐ. 25ܘܟܲܕ ܫܡܸܥܠܗَܘܿܢ ܬܲܠܡܝܼܕܹ̈ܐ: ܥܵܓ̰ܒܝܼ ܗ݇ܘܵܘ ܪܵܒܵܐ: ܘܐܵܡܪܝܼ: ܒܲܣ ܡܵܢܝܼ ܡܵܨܹܐ ܚܲܝܹܐ. 26ܚܹܪܹܗ ܒܝܼܵܝܗܝ ܝܼܫܘܿܥ: ܘܐَܡܝܼܪܹܗ ܐܸܠܵܝܗܝ: ܠܟܸܣ ܒܢܲܝ̈ܢܵܫܵܐ ܐܵܗܵܐ ܠܹܐ ܡܵܨܝܵܐ: ܐܝܼܢܵܐ ܠܟܸܣ ܐܲܠܵܗܵܐ ܟܠ ܡܸܢܕܝܼ ܟܹܐ ܡܵܨܝܵܐ. 27ܗ̇ܝܓܵܗ ܓ̰ܘܼܘܸܒܠܹܗ ܟܹܐܦܵܐ: ܘܐَܡܝܼܪܹܗ ܐܸܠܹܗ: ܗܵܐ: ܐܲܚܢܵܢ ܫܒܸܩܠܲܢ ܟܠ ܡܸܢܕܝܼ ܘܐَܬܹܐܠܲܢ ܒܵܬَܪܘܼܟ. ܒܲܣ ܡܘܼܕܝܼ ܒܸܬ ܗܵܘܹܐ ܠܲܢ. 28ܐܵܡܸܪ ܐܸܠܵܝܗܝ ܝܼܫܘܿܥ: ܬܪܘܿܨܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܐܲܚܬܘܿܢ ܕܐَܬܹܐܠܵܘܟ̣ܘܿܢ ܒܵܬَܪܝܼ: ܒܥܵܠܡܵܐ ܚܲܕَܬܵܐ ܐܝܼܡܲܢ ܕܝܵܬܸܒ̣ ܒܪܘܿܢܹܗ ܕܐ݇ܢܵܫܵܐ ܥܲܠ ܬܪܘܿܢܘܿܣ ܕܚܸܩܪܹܗ: ܒܸܬ ܝܵܬܒ̣ܝܼܬܘܿܢ ܐܘܼܦ ܐܲܚܬܘܿܢ ܥܲܠ ܬܪܸܥܣܲܪ ܬܪ̈ܘܿܢܘܿܣܹܐ: ܘܒܸܬ ܕܵܝܢܝܼܬܘܿܢ ܬܪܸܥܣܲܪ ܫܲܒ̣̈ܛܹܐ ܕܝܼܣܪܵܝܹܠ. 29ܘܟܠ ܐ݇ܢܵܫܵܐ ܕܫܵܒܸܩ ܒܵܬܹ̈ܐ: ܝܲܢ ܐܵܚܘܿܢܘܵܬܹ̈ܐ: ܝܲܢ ܚܵܬܘܵܬܹ̈ܐ: ܝܲܢ ܒܵܒܵܐ: ܝܲܢ ܝܸܡܵܐ: ܝܲܢ ܒܲܟ̣ܬܵܐ: ܝܲܢ ܒܢܘܿܢܹ̈ܐ: ܝܲܢ ܚܲܩܠܵܢܹ̈ܐ: ܒܚܵܬܸܪ ܕܫܸܡܝܼ: ܚܲܕَ ܒܡܵܐܐ ܒܸܬ ܩܵܒܸ̇ܠ: ܘܚܲܝܹ̈ܐ ܕܠܐܵܒܲܕ ܒܸܬ ܝܵܪܸܬ. 30ܐܝܼܢܵܐ ܪܵܒܵܐ ܩܵܕَܡܵܝܹ̈ܐ ܒܸܬ ܗܵܘܝܼ ܐَܚܵܪ̈ܵܝܹܐ: ܘܐَܚܵܪ̈ܵܝܹܐ ܩܵܕَܡܵܝܹ̈ܐ.